* Ta fito da sabon tsarin kasuwanci da kowa zai amfana
HUKUMAR Tace Finafinai ta Jihar Kano ta bayyana cewa kama masu sana’ar tura finafinan Hausa a waya ko komfuta, waɗanda ake kira ‘yan ‘downloading’, ba ita ce mafita ba wajen yaƙi da satar basira, wato ‘piracy’.
Ta ce a maimakon haka, za ta samar da wata kafa da masana’antar Kannywood za ta riƙa samun kuɗin shiga.
Wannan kuwa ita ce sayar da finafinan Hausa kai-tsaye ga ‘yan ‘downloading’ ɗin, ta yadda furodusoshi za su amfana.
Daraktan Wallafe-wallafe (Publications) kuma mai kula da harkar ‘yan ‘downloading’ a Hukumar Tace Finafinan, Malam Idris Zakari Ya’u, shi ne ya bayyana haka a yayin wata zantawa da ya yi da mujallar Fim.
Yayin da ya ke yin ƙarin haske kan sabuwar hanyar da ake son samarwa, daraktan ya ce tare da haɗin gwiwar ƙungiyar masu rarraba finafinan Hausa, wato ‘Kannywood Distribution Network’, za a gudanar da tsarin.
Ya yi nuni da cewa maimakon a ce ko da yaushe hukuma na bin ‘yan ‘downloading’ ta na kama su tare da kai su kotu ana cin su tara, gara ƙungiyar masu rarraba finafinai da ƙungiyar masu ‘downloading’ ɗin su zauna su san yadda za su gudu tare su tsira tare.
Ya ƙara da cewa shigo da ‘yan ‘downloading’ cikin lamarin hukumar ne kaɗai zai bada damar a shimfiɗa masu dokoki tare da ba su damar sayen finafinan da hukumar ta saki a kowane mako domin samun finafinan ba tare da sun ji shakkar wani zai zo ya kama su ba.
Malam Idris ya ce, “Mun dai cimma matsaya kan cewa ƙungiyar ‘yan ‘dowloading’ za ta riƙa sayen finafinai tare da fastoci a gun ƙungiyar ‘Kannywood Distribution Network’ domin rarraba wa ‘ya’yan ta.
“Kuma mu na sa ran shugabannin wannan ƙungiya za su ci gaba da ba mu haɗin kai don cigaban kasuwancin su kamar yadda su ka rubuta a cikin kundin dokokin da su ka gabatar mana.”
A cewar sa, “Tun bayan shigowar Isma’il Na’abba Afakallah a matsayin mai jagorantar wannan hukuma, ya ke ƙoƙari wajen ganin an kawo daidaito ga masu sana’ar tura finafinai, wanda a baya su ke sayen finafinai su yi kwafin su a kan komfutocin su su na tura wa mutane ba tare da sun nemi izinin mai fim ɗin ba. Amma yanzu masu shirya fim ɗin da kan su su ke kawo finafinan su tare da fastoci domin a sayar wa da waɗannan mutane.”
Bayan haka, mujallar Fim ta tuntuɓi shugaban haɗaɗɗiyar ƙungiyar ‘yan ‘downloading’ ta Jihar Kano, Malam Yakubu Yahaya, wanda ya bayyana jin ɗaɗin sa dangane da wannan al’amari da Hukumar Tace Finafinai ta bijiro da shi tare da bada tabbacin samun haɗin kan ‘ya’yan ƙungiyar a ko da yaushe kamar yadda aka nema a gare su.
Ya ce tabbas an ɗauko hanyar warware dukkan wata matsala tsakanin su da furodusoshi waɗanda a da su ke zuwa tare da jami’an tsaro su na kama su tare da komfutocin su.
Malam Yakubu ya yi kira ga sauran masu tura finafinan Hausa waɗanda ba su yi rajista da ƙungiyar ba da su hanzarta yi tare da sayen finafinai a wurin su.
Ya yi gargaɗin cewa duk wanda ya bijire wa wannan yarjejeniya, akwai tsattsauran mataki da hukuma za ta ɗauka a kan sa, ya ce “gudun kar a yi kar a soma”.
Mujallar Fim ta ruwaito cewa tun bayan da kasuwancin finafinan Hausa da ake saki a faifan sidi ko dibidi ya taɓarɓare dai, masu ruwa da tsaki a Kannywood su ke ta ƙoƙarin ganin sun samar da sabbin hanyoyin samun kuɗin shiga da za su maye gurbin harkar sidi ko dibidi.
Ana ganin bin wannan sabuwar hanyar zai taimaka wajen dawowa tare da farfaɗo da kasuwancin finafinai ta wannan ɓangaren.
