‘YAN Kannywood da suka haɗa da Ali Nuhu da Abba El-Mustapha sun nuna farin cikin su game da muƙamin da Gwamnan Kano, Injiniya Abba Kabir Yusuf, ya ba jarumi kuma mawaƙi Sani Musa Danja.
Tun bayan da sanarwar bai wa Sani Danja muƙamin mai ba gwamnan shawara na musamman kan matasa da wasanni, abokan sana’ar sa suka fara ɗora hotunan sa a soshiyal midiya suna taya shi murna.
A cikin wata sanarwa da ya bayar, Babban Sakataren Hukumar Tace Finafinai da Ɗab’i ta Jihar Kano, Alhaji Abba El-Mustapha, ya nuna jin daɗin sa ga gwamnan bisa la’akari da rawar da Sanin ya taka, inda ya bayyana goyon bayan sa da jajircewar sa ga cigaban masana’antar nishaɗantarwa ta Jihar Kano da tsare-tsaren gwamnati na wayar da kan jama’a da ilmantar da su.
Babban sakataren ya bayyana naɗin Sani a matsayin wanda ya cancanta, duba da irin gudunmawar da ya bayar a harkar nishaɗantarwa a jihar.
Ya kuma roƙi Allah da ya ƙara wa Sani jajircewa da himma da hikima wajen gudanar da ayyukan sa cikin nasara da kuma tabbatar da amanar da aka ɗora masa.
Haka shi ma Manajin Darakta na Hukumar Shirya Finafinai ta Nijeriya (NFC), Dakta Ali Nuhu, ya taya Sani Danja murna da cewa, “Congratulations my brother, Allah ya taya riƙo, ameen.”
Darakta Isma’il Khaleel Ja’en cewa ya yi: “Alhamdu lillah! Muna taya ɗan’uwa, abokin sana’a Sani Musa Danja da samun muƙami daga mai girma gwamnan Jihar Kano, Injiniya Abba Kabir Yusuf.
“Sani Musa Danja ya rabauta da muƙamin S.A. Youth and Sport. Muna addu’ar Allah ya riƙa masa da sauran ‘yan’uwa da su ka rabauta da muƙaman,” inji shi.
Shi kuma jarumi Ibrahim Maishunku cewa ya yi, “Congratulations my brother for your appointment as SSA Youth and Sport to his excellency Kano State Governor, Eng. Abba Kabir Yusuf. Allah ya iya maka.”
