WATA ƙungiyar siyasa ta ‘yan fim a Kano mai suna Kannywood Awareness Network for Abba Gida Gida, ta bayyana shirin ta na gudanar da babban taron nuna goyon baya ga Gwamnan Jihar Kano, Alhaji Abba Kabir Yusuf, a watan gobe.
Shugaban ƙungiyar, fitaccen darakta Isma’il Khalil Ja’en Mahy, shi ne ya bayyana hakan yayin da yake zantawa da manema labarai kan manufofi da ayyukan ƙungiyar.
A cewar sa, an kafa ƙungiyar ne domin samar da kyakkyawar alaƙa tsakanin gwamnatin jihar da Kannywood, tare da tabbatar da cewa masu harkar finafinan Hausa suna cikin waɗanda ke amfana da duk wani shiri na bunƙasa harkokin al’adu da masana’antu.
Ya ce: “Ƙungiyar tana da manufofi da tsare-tsare masu yawa da za su taimaka wajen cigaban masana’antar Kannywood. Mun kafa ta ne domin mu haɗa kai da gwamnati, ta yadda idan aka tsara shirye-shiryen cigaban masana’antu, Kannywood ma za ta kasance cikin masu cin gajiyar waɗannan tsare-tsare.”
Ya ƙara da cewa ana ci gaba da shirye-shiryen gudanar da babban taron ƙungiyar a watan Agusta, inda za a bayyana manufofin ta da irin alaƙar da take da Gwamnatin Jihar Kano.
Isma’il ya ce taron zai kuma zama wata dama ta nuna goyon bayan ƙungiyar ga gwamnan, bisa abin da ya bayyana a matsayin ƙoƙarin gwamnatin sa wajen bunƙasa masana’antar Kannywood.
Ya ce: “Za mu bayyana irin cigaban da gwamnatin Gwamna Abba Kabir Yusuf ta kawo wa masana’antar Kannywood. Wannan ne ya sa muke ci gaba da mara masa baya, tare da fatan zai ci gaba da samar da manufofin da za su ƙara bunƙasa masana’antar domin amfanin masu sana’ar yanzu da kuma waɗanda za su zo nan gaba.”
Daraktan ya jaddada cewa ‘yan Kannywood a ƙarƙashin ƙungiyar sun himmatu wajen haɗa kai domin samar da duk wani tsari da zai inganta masana’antar finafinan Hausa.
A cewar sa, babban manufar taron ita ce sake tabbatar da cikakken goyon bayan ƙungiyar ga gwamnan, wanda aka fi sani da Abba Gida-Gida, tare da ƙarfafa haɗin gwiwa tsakanin gwamnatin jihar da industiri.
