Kungiyar Marubuta ta Nijeriya (ANA), reshen Jihar Kano, ta ɓullo da wani shiri na horas da matasa dabarun rubuta gajerun labarai, da nufin farfaɗo da harkar rubuce-rubucen adabi tare da dasa sha’awar karatu da rubutu a zukatan matasan.
A wata sanarwa da kwamitin editoci na ƙungiyar ya fitar, ANA Kano ta ce tana farin cikin sanar da membobin ta masu son ƙara ƙwarewa, masu sha’awar koyon rubutu, da ɗaliban makarantun sakandare game da wani taron bita na musamman da ƙungiyar za ta riƙa shirya wa dukkan rubu’in shekara.
Sanarwar ta ce bitar wannan rubu’in za ta mayar da hankali ne kan “Dabarun Rubuta Gajerun Labarai”, inda mahalarta za su koyi dabarun da ake amfani da su wajen tsara gajeren labari mai armashi da tasiri a zuciyar mai karatu.
A cewar ƙungiyar, a karon farko ta gayyaci sananne kuma gogaggen marubuci, Malam Jamilu Haruna Jibeka, domin jagorantar bitar tare da ilimantar da mahalarta kan dabarun rubuta gajerun labarai.
Muhimman bayanan bitar
- Take: Dabarun Rubuta Gajerun Labarai
- Jagora: Jamilu Haruna Jibeka
- Rana: Asabar, 5 ga Satumba, 2026
- Lokaci: 10:00 na safe
- Wuri: Jami’ar Khalifa Isyaku Rabi’u, Ƙofar Gadon Ƙaya, Kano
Rijista da abin da ta ƙunsa
Ƙungiyar ta ce kuɗin rijistar mahalarta shi ne N2,000, yayin da ɗaliban da aka gayyata za su halarci bitar kyauta.
Rijistar ta ƙunshi samun shaidar halarta (satifiket), kayayyakin karatu da rubutu, da kuma ɗan abin taɓawa.
Yadda za a yi rijista
Masu sha’awar halartar bitar za su biya kudin rijista ta asusun 8065270511 na Opay, sannan su aika da rasitin biyan kudin tare da cikakken suna da lambar waya ta WhatsApp zuwa 08065270511.
Kungiyar ta ce wa’adin aika bayanan rijistar shi ne Talata, 2 ga Satumba, 2026.
Ta kuma bayyana cewa za a taƙaita adadin mahalarta domin samar da kyakkyawan yanayin koyarwa da koyo, inda ta buƙaci masu sha’awar shiga bitar da su gaggauta yin rijista domin samun gurbi.
