A CI gaba da ya ke yi na taimaka wa abokan sana’ar sa na Kannywood, shahararren mawaƙin siyasa Dauda Adamu Kahutu (Rarara) ya ƙara bada tallafin kuɗi ga wasu matan aure mawaƙa da jaruman Kannywood kimanin su 38.
Wannan shi ne karo na biyu da mawaƙin ya bada tallafin kuɗi ga ‘yan fim; a karo na fim ya raba zunzurutun kuɗi har naira miliyan uku ga jarumai maza da mata su 60 inda ko wannen su ya samu N50,000.
Tallafi na biyu ya sha bamban da na farkon, domin a wannan karon ya kasa tallafin ne zuwa rukuni uku.
Rukunin farko ya ƙunshi maza zalla su 12 waɗanda kowanne zai amfana da N50,000.
Rukuni na biyu ya haɗa da mata biyu, jaruma da furodusa, inda kowace za ta karɓi N100,000.
Rukuni na uku ya ƙunshi matan aure mawaƙa kimanin 24 waɗanda kowace za ta karɓi N30,000.
Jimillar su dai za su amfana da naira miliyan ɗaya da rabi.
A jawabin da sakatariyar kamfanin Rarara Multimedia, Rabi’at Sani Umar (Ummin Ibro), ta fitar a Instagram a yau, ta karanto sunayen waɗanda za su amfana da tallafin tare da bayyana inda kowannen su zai samu kuɗin da aka ba shi.
Ummi ta fara da karanto jerin sunayen maza rukunin farko na tallafin waɗanda su ka haɗa da Baba Hasi, Baba Ƙarami, Idris Shu’aibu Lilisco, Baba Labaran, Baba Ƙarƙuzu, Musa Mohammed Abdullahi, Ɓawo, Malam Dare, Balarabe Jaji, Bankaura, Baba Sogiji da Tijjani Faraga.
Ta ce duk wanda ya ji sunan sa sai ya nemi ita Ummin Ibro domin ya karɓi N50,000.
Rukuni ya ƙunshi sunayen su furodusa Hajiya Balaraba Ramat da jaruma Ummi Zee-Zee, inda su ma aka ce su je wajen Abubakar Bashir Maishadda domin su karɓi N100,000 ko waccen su.
Rukunin ƙarshe mawaƙa ne matan aure, wato Sa’a Sadi, Sa’a Vocal, Zainab Diamond, Naja’atu Ta-Annabi, Murja Baba, Ummi Ahmad Sadi Fari, Luba Jogana, Asiya ‘Yar Sudan, Ummi Fagge, Murjanatu Ambato, A’isha Nagudu, Fati Kawo, Fa’iza Badawa, Maryam Sangandale, Amina Jakara, Sadiya Ali Baba, Fati Solver, Aisha Gwammaja, Safiya Wudil, Husaina Gombe, Fiddausi ‘Yar-Dubai, Zuwaira Isma’il, Suhaima Danko da A’isha Sudan.
An bayyana cewa duk wadda ta ji sunan ta a wannan rukuni ta tuntuɓi Zainab Diamond domin ta karɓi N30,000.
Idan mai karatu zai iya tunawa, a makwannin baya mujallar Fim ta kawo labarin yadda mawaƙin ya bada tallafin tsabar kuɗi har miliyan uku ga wasu daga cikin jaruman Kannywood su 60 domin su yi hidimar azumin watan Ramadan.
Da dama daga cikin jaruman sun yi farin ciki tare da bayyana tallafin a matsayin abu da ya zo a daidai lokacin da su ke cikin buƙatar sa.
