FITACCEN darakta a Kannywood, Hassan Giggs, ya sabunta shauƙin soyayyar sa ga matar sa, Muhibbat Abdulsalam, inda ya nuna cewa bai da kamar ta.
Giggs ya faɗi haka ne a saƙon taya murna ga matar tasa wadda ta cika shekara 42 da haihuwa a yau, 1 ga Janairu.
A saƙon, wanda ya wallafa a soshiyal midiya kuma mujallar Fim ta fassaro, shugaban na kamfanin shirya finafinai na Giggs International, Kano, ya faɗa wa tsohuwar fitacciyar jarumar ta Kannywood cewa: “Ina taya ki murnar zagayowar ranar haihuwar ki, masoyiya ta.
“Kin cika shekaru 42 da haihuwa, amma har yanzu ki na kama da matashiyar da shekarun ta ba su kai hakan ba.”
Daga nan daraktan ya miƙa godiyar sa ga Allah, ya na faɗin: “A gaskiya ina godiya ga Allah Maɗaukakin Sarki da ya ba ni macen aure abar so kamar wannan, mace mai zuciyar zinari.
“Wata sa’a sai in riƙa tunanin wannan soyayya mai daɗi wadda ke saka ni amincewa da cewa lallai a rayuwa akwai soyayyar gaskiya.
“Duk da yake ba lallai ba ne in kasance wanda ya fi kowa, amma na samu abin da ya fi kowanne. Kuma wannan labarin wannan soyayyar da ta fi kowacce, na soma tunani a kan sa, kuma sai ta ke kwararowa babu wani surki a cikin ta. Sai kalmomin su dinga tahowa tare da farin ciki mai cika zuciya da mace mafi dacewa.
“Barka da zagayowar ranar haihuwar ki, masoyiya ta.
“Uwar kyawawan ‘ya’ya na mata guda 3: Aisha, Fatima da Khadija.”
Saƙon na Giggs ya burge mutane sosai; kusan duk wanda ya karanta shi sai ya yaba.
Da yawa sun yi wa ma’auratan addu’ar fatan alheri.
Su dai su Giggs da Muhibbat, a watan Yuni 2021 ne su ka cika shekara 13 cur da aure.
Idan kun tuna, ba yau ba ne Giggs ya fara bayyana shauƙin so game da matar sa, kuma ya taɓa wa mujallar Fim cewa tun da su ke, Muhibbat ba ta taɓa yin yaji ko da sau ɗaya ba.
Haka kuma ya taɓa faɗa wa wakilin mu cewa ba zai taɓa yi mata kishiya ba, kuma auren su na mutu-ka-raba ne.
