GWAMNAN Jihar Kano, Dakta Abdullahi Umar Ganduje, ya naɗa fitaccen darakta, jarumi kuma daga cikin dattawan Kannywood, Ishaq Sidi Ishaq, matsayin babban mai taimaka masa na musamman kan harkokin fasaha.
A Turance, muƙamin shi ne ‘Senior Special Assistant, Creative Industries’.
Mujallar Fim ta ruwaito cewa harkokin fasaha sun haɗa da shirya finafinai, waƙoƙi, rubuce-rubuce da sauran nau’o’i na ƙirƙira.
An bada sanarwar naɗin a cikin takarda mai ɗauke da sa hannun Bilkisu Shehu Maimota a madadin Sakataren Gwamnatin Jihar Kano.
A takardar, mai ɗauke da kwanan wata 27 ga Mayu, 2021, an sanar da Ishaq cewa an naɗa shi muƙamin ne bisa cancanta, sadaukarwa, ƙwazo, son ƙasar sa da kuma nuna goyon baya da ya yi.
Gwamnatin ta ce, ”Mu na fatan za ka yi amfani da ƙwarewar ka wurin gudanar da wannan aiki da aka ɗora maka domin ciyar da fannin ƙirƙire-ƙirƙire a faɗin Kano.”
Har wa yau ta taya shi murna tare da addu’ar Allah ya taya shi riƙo.
A ƙarshe, takardar ta bayyana ranar 20 ga Mayu, 2021 a matsayin ranar da muƙamin ya fara aiki.
‘Yan’uwa da abokan arziki sun raka Ishaq zuwa ofishin sakataren gwamnati a jiya inda ya karɓi takardar naɗin nasa.
‘Yan fim da dama sun taya shi murna tare da yi masa fatan alheri a wannan sabon muƙami.
Da yawa su na sa ran wannan naɗin zai kawo wa Kannywood gagarumin cigaba domin Ishaq, wanda ƙwararren ɗan fim ne, zai yi duk iya mai yiwuwa wajen ganin ya jawo hankalin gwamnati domin tallafa wa masana’antar.
A saƙon godiya da ya tura wa jama’a a yau, Ishaq Sidi Ishaq ya ce: “Salam ‘yan’uwa, ina ƙara godiya da murnar da ku ke taya ni da ita, da addu’o’in ku. Allah ya saka muku da alkhairi, ameen. Na gode ƙwarai da gaske. Sai a ci gaba da sa mu a addu’a. Allah ya ba mu ikon kwatanta gaskiya tare da yin abubuwan da al’umma za su amfana. Na gode sosai.”
Naɗin na Ishaq irin wanda Gwamna Nasiru El-Rufa’i na Jihar Kaduna ya yi wa Hajiya Halima Idris ne.
