MEMBOBIN Ƙungiyar Marubuta ta Nijeriya (Association of Nigerian Authors, ANA), reshen Jihar Kano, sun zaɓi Tijjani Muhammad Musa a matsayin sabon shugaban su.
Sun yi hakan ne a wajen babban taron ƙungiyar na shekara-shekara wanda aka yi jiya Asabar, 29 ga Mayu, 2021 a Ɗakin Karatu na Murtala Muhammed da ke Kano.
A taron ne su ka gudanar da zaɓen fidda sababbin shugabannin ƙungiyar.
A sanarwar da jami’in yaɗa labarai na Hausa na ƙungiyar, watoIbrahim M. Indabawa, ya fitar, an bayyana cewa a taron an kuma zaɓi Mazhun Idris a matsayin sabon Magatakardan ƙungiyar, yayin da Maimuna Idris Beli ta kasance Mataimakiyar Shugaba.
Bugu da ƙari, an zaɓi Ibrahim Muhammad Indabawa a matsayin Jami’in Yaɗa Labarai.
Sababbin shugabannin za su ja ragamar ƙungiyar na tsawon shekara biyu masu zuwa, wato daga 2021 zuwa 2023.
Sanarwar ta ce sabon shugaba Tijjani Muhammad Musa, wanda marubucin waƙoƙi da littattafai cikin harsunan Hausa da Turanci ne, ya taɓa riƙe muƙamin Magatakardan ƙungiyar a baya.
ANA ta na da rassa a kowace jiha a ƙasar nan, kuma ta na wakiltar dukkan marubuta da mawallafa littattafai da ke faɗin Nijeriya.
Sanarwar da Indabawa ya bayar ta ce wakilan ANA daga uwar ƙungiyar ta ƙasa sun halarci taron don shaida yadda zaɓen ya kasance.
