INNA lillahi wa inna ilaihir raji’un! Allah ya yi wa mahaifiyar fitaccen sha’iri Aminuddeen Ladan Abubakar (Alan Waƙa) rasuwa a daren yau.
Hajiya Bilkisu Sharif Adam ta rasu a Kano ta na da shekara 70 a duniya.
Alan Waƙa da kan sa ya bayar da sanarwar wannan rashi a Facebook, inda ya ce mahaifiyar tasa ta bar ‘ya’ya biyu da kuma jikoki 25.
Ya ƙara da cewa za a yi jana’izar ta a gobe Talata da misalin ƙarfe 9:30 na safe.
Allah ya rahamshe ta, ya ba iyalan ta haƙurin jure wannan babban rashi.
