Masu shirya Bikin Baje Kolin Finafinai na Kasa da Kasa na Kaduna (Kaduna International Film Festival – KADIFF), ƙarƙashin jagorancin shugaban bikin, Mista Israel Kashim Audu, sun bayyana cewa sun kammala dukkan shirye-shiryen da suka dace domin gudanar da bikin karo na tara, wanda ake sa ran zai tattaro manyan masu ruwa da tsaki a harkar finafinai daga sassa daban-daban na duniya.
Bikin na bana zai gudana ne daga ranar 25 zuwa 29 ga watan Agustan 2026 a Jihar Kaduna, ƙarƙashin taken “Cultural Renaissance” (Farfaɗowar Al’adu), da nufin bunƙasa al’adun gargajiya, ƙarfafa haɗin kai tsakanin al’umma da kuma nuna muhimmancin finafinai a matsayin wata kafa ta isar da saƙonni masu tasiri.
Masu shirya taron sun bayyana cewa an tanadi shirye-shirye masu armashi da suka haɗa da nuna finafinai daga ƙasashe daban-daban, bitocin horaswa ga masu sana’ar finafinai, tarurrukan musayar ilimi da ƙwarewa, da kuma bikin karrama fitattun jarumai da masu ruwa da tsaki ta hanyar ba su lambobin yabo.
A cewar masu shirya bikin, KADIFF na ci gaba da zama wata muhimmiyar gada da ke haɗa masu shirya finafinai, jarumai, masu zuba jari da sauran masu ruwa da tsaki domin tattauna hanyoyin haɓaka masana’antar nishaɗi tare da ƙarfafa musayar al’adu tsakanin al’ummomi.
Sun ƙara da cewa bikin na bana zai ci gaba da ɗaukar tutar yaɗa saƙonnin zaman lafiya, haɗin kai da bunƙasa al’adu, tare da haskaka irin ci gaban da masana’antar finafinai ke samu a Nijeriya da ma duniya baki ɗaya.
Mujallar Fim ta ruwaito cewa an kammala dukkan shirye-shiryen taron cikin tsari, yayin da masu shirya bikin ke ci gaba da dakon isowar baƙi da mahalarta daga sassa daban-daban na duniya domin halartar wannan gagarumin taron finafinai na kasa da kasa da ake sa ran zai kasance ɗaya daga cikin manyan al’amuran nishaɗi na shekarar 2026.
