BAYAN dogon lokacin da aka kwashe ana jira, yanzu dai an fitar da sakamakon Gasar Gajerun Labarai da Jami’ar Tarayya ta Dutsin-Ma (FUDMA) ta shirya kan matsalar rashin tsaro a Arewacin Nijeriya.
Gasar ta kasance dama ta musamman ta nuna yadda adabi zai iya zama hanyar isar da saƙo da wayar da kai kan matsalolin da ke addabar al’umma a wannan lokaci.
An tsara gasar tun a shekarar 2024, kuma labarai sama da 500 ne suka shiga. Bayan tantancewa da nazari da masana da ƙwararru suka gudanar, an zaɓi labarai 30, aka tattara su aka wallafa a cikin kundi guda domin adana basira da tunani da saƙonnin da ke cikin rubuce-rubucen marubutan.
Daga cikin waɗannan labarai 30, an sake zaɓar 15 da suka cancanci karramawa, sannan aka fitar da zakaru uku. Su ne:
- Ruƙayya Ibrahim Lawal daga Jihar Sakkwato
- Nana Aicha Hamissou daga Maraɗi, Jamhuriyar Nijar
- Hauwa Shehu daga Jihar Kano
An gudanar da wannan gagarumin biki a ɗakin taro na otal ɗin Hillside da ke Katsina a yayin Taron Ƙasa da Ƙasa kan Ayyuka da Waƙoƙin Aminu Ladan Abubakar (Ala).
Bayan karɓar kyaututtuka, marubutan da suka yi nasara sun miƙa saƙon godiya ta musamman ga Jami’ar Tarayya ta Dutsin-Ma, wadda ta assasa gasar, da dukkan masu shirya taron, da masana, da ƙwararru da alƙalan da suka sadaukar da lokacin su domin hidimta wa adabi.
