FITACCEN jarumi kuma furodusa a Kannywood, Alhaji Hamisu Lamiɗo Iyan-Tama, ya bayyana matsayin sa kan ce-ce-ku-cen siyasar da suka dabaibaye masana’antar, musamman kalaman da wasu ‘yan fim suke yi cewa dukkan masu harkar fim suna goyon bayan tafiyar mawaƙin siyasa Dauda Abdullahi Kahutu (Rarara) da kuma jam’iyyar APC.
Iyan-Tama, wanda sanannen ɗan siyasa ne a Kano, ya ce ba gaskiya ba ne a ce dukkan ‘yan fim suna tare da APC, yana mai jaddada cewa kowane mutum yana da nasa ra’ayin siyasa.
Ya yi wannan kalamin ne a wata hira da aka yi da shi a shafin onlayin na ‘Ɗan’uwa Rano TV’ a Kano.
Ya ce: “Ni uba ne a cikin harkar fim, shi kuma Rarara yaron mu ne. Saboda haka, ba dukkan mu ne ‘yan APC ba. Kowa yana da ra’ayin sa. Ni dai ba zan yi tafiyar Rarara ba. Da na yi tafiyar Rarara gara na mutu.”
Ya ci gaba da cewa, “Rarara ɗin nan ni ne na kai shi tafiyar Muhammadu Buhari, amma daga baya ya ci amanar mu, domin ya cuce mu. Akwai mutanen da zan iya zaɓa a cikin APC, amma ni ba na cikin jam’iyyar.”
Dangane da Shugaba Bola Ahmed Tinubu kuwa, Iyan-Tama ya ce ba ya cikin masu goyon bayan sake zaɓen sa.
Ya ce: “Ni ba zan zaɓi Tinubu ba, domin tambayoyin da muka yi tun lokacin zaɓen sa har yanzu ba mu samu amsoshin su ba. Kowa yana ganin yadda matsalar tsaro ta ƙara ta’azzara a Arewa, amma an kasa magance ta. Abin da ba a iya yi wa magani tsawon shekaru ba, sai yanzu da ake tunkarar zaɓe ake cewa za a shawo kan sa. Don haka ni ba na tafiyar Tinubu, kuma ba zan zaɓe shi ba.”
Da aka tambaye shi game da yiwuwar goyon bayan sa ga Peter Obi ko Rabi’u Musa Kwankwaso, jarumin ya ce shi masoyin Kwankwaso ne, amma ba zai mara wa Obi baya ba.
Ya ce: “Ni masoyin Kwankwaso ne saboda na yarda cewa mutum ne nagari. Amma ba zan yi tafiyar Obi ba, kuma duk wanda nake da tasiri a kan sa ba zan ƙarfafa masa ya zaɓi Obi ba. Sai dai hakan ba yana nufin ba zai iya cin zaɓe ba idan Allah ya ƙaddara masa.”
